jannat ke pattay...[Leaves Of Paradise]

part 51

Ab bata to di hai na. Ab jao, kal uska time hone wala hai aur main aaj campus nahi jaungi. Wo upar apne bistar mein phir se leit gayi aur kambal munh par daal liya.

"Bohot zaleel ho tum, Haya! Oh God, wo tumhara husband hai... DJ abhi theek se hairan bhi na ho paayi thi ke ghadi par nigaah pari.

"Aray aath baj gaye." Wo magazine phenk kar uthi aur khidki ke samne ja kar khari hui. Phir slide khol kar, chehra bahar nikala, labon ke gird dono haathon ka pyala banaye ba awaz buland chalayi.

"Goood morninggg... DJ... ni yyy se le le le..." Ne se le le le... Door neeche se kisi ladke ne jawabi haank lagayi thi.

"Zaa... leil... wo jal kar aur zor se chalayi.

"Chup karo, mujhe sone do." Haya ne takia khinch kar usse de maara, magar wo usi khidki ke paas khari sadaaien lagati rahi.

Wo university ki imarat ki bahari seedhiyan utar rahi thi, jab uska mobile baja. Wo wahiin teesri seedhi par ruki, file aur kitaben doosre haath mein muntaqil kiye aur baari baari coat ki dono jebain khankali, phir androni jeb mein haath dala aur chinghaarta ho a mobile bahar nikala.

Yeh uska Pakistani sim wala phone tha. Dosara mobail jaihan ke paas hone ke baa'is wo aaj kal usse hi istemal kar rahi thi.

Chamakti screen par Turkey ka koi ghair shanaasa number likha araha tha. Number kis ka tha, usay qatai yaad nahi aya. Number yaad rakhne me mein wo bohat chor thi. Usay apne Pakistani number tak ke aakhri do hund se bhoolte thi aur Turkey wala to khair siray se yaad nahi...

Hello! Wo phone kaan se lagaye huye wahiin seedhi pe baith gayi. Kandhe se bag utaar kar ek taraf rakha.Jahan tera naqsh qadam dekhte hain

Khayaban khayaban Aram dekhte hain

Awaz ajnabi thi bhi aur nahin bhi, magar uska loch, utar chadhao aur andaaz... sab shanasa tha. Wo lab bheench gayi.

Abdul Rehman baat kar raha hoon aur baat karne ki ijaazat chahta hoon. Go ke wo parha likha lagta tha magar andaaz se kahin na kahin Mumbai ke kisi nichlay tabqay ke shehri ki jhalak aati thi.

"Kya baat karni hai aap ko? Aakhir aap mujhse chahte kya hain?"

"Milna chahta hoon. Bataiye kya yeh mumkin hai?"

Uski reerh ki haddi mein ek sard lehar dorh gai. Hathon mein bay ikhtiyar pasinay mein bheeg gayin.

"Main nahin mil sakti."

Kyun? Jis phone call mein aap ki dost ne aap ke cousin ko apne saath chalne ki offer ki thi, us mein ghaleban unhon ne Byuk Ada ka zikr kiya tha. Princess Isles... kya aap udhar nahin arahi hain?"

To wo us ki calls tape kar raha tha aur tabhi us ne Pakistan wale mobile par call ki thi kyun ke wo Turkey wale phone ke jahan ki tehweel mein hone ke baray mein janta tha.

"Main Byuk Ada nahi ja rahi. Ainda aap na to mera peecha karenge, na hi meri calls tape karenge. Warna main aap ki jaan le loongi, samjhe!" Us ne jhila kar phone kaan se hataya aur surk button zor se dabaaya. Mobile off ho gaya.

Wo gehri saans le kar uth khari hui. Jaane kab yeh shakhs us ka peecha chhore ga.
                             ☆☆☆☆

Samandar ki jhaag bhari neeli lehron par se hawa sarsarate hue guzar rahi thi. Wo dono ferry ki balcony meinKhaday samnay samandar dekh rahe thay. Jahan qadray jhuk kar reling pakray khara tha aur Haya gardan seedhi utthaye lab bhenchay samnay ufaq pe dekh rahi thi.

DJ abhi abhi camera le kar balcony ke dosray sire tak gayi thi, so inn dono ke darmiyan khamoshi cha gayi thi.

Wo jab se kadey kuye ki bandar gah pe ferry mein sawar hue thay, tab se aapas mein baat nahin kar rahe thay. Ferry waise bhi kheecha kheech bhara tha. Jagah dhoondne mein hi itna waqt sarf hua. Ferry ki nichli manzil jo charon taraf se sheeshon se band thi, par jadde tamam sofe aur kursiyan bhare thay, so wo buland manzil pe aa gaye jo opne air thi. Khula sa wasee aahata jahan har taraf sofe aur kursiyan thay, magar ek nashist bhi khali nahin thi. Unko balaakhir ferry ke kinaray pe bani tang si balcony mein khare honay ki jagah mili. Wo itni tang thi ke samandar ki janib rukh kar ke ek waqt mein ek banda hi reling ke saath khara ho sakta tha. Balcony ki gallery lambi thi aur logon ki ek taveel qataar wahan khari thi.

Wo dono bilkul daayein taraf ke koney mein thay. Hawa be had sard thi, phir bhi jkhan siyah sweater ki asteeno kehniyon tak moray hue tha. Magar isay be had sardi lag rahi thi ke isne siyah lambay skirt ke oper sirf sarmei sweater hi pehna rakha tha, sawab siyah stole ko sakhti se kandhon ke gird lapet kar baazu seenay pe banda rakhe thay.

"Geumi sum shine... Geumi sum rain..."

Haya ke baayein janib reling pakray Indian larkiyon ka ek group khara tha. Wo larkiyan bohot si thay, wo kandhay se kandha mila kar khari thay, aur unki qataar balcony ke dosray sire tak jati thi. Wo kisi study tour pe Istanbul ayi hui thay aur ab chehre ke gir raha thon ka pyala banaye ba awaz buland lahak lahak kar geet ga rahi thi. "Tum is roz baghair bataye uth kar chali gayi. Tumhein pata hai mein kitni deer Istiqlal street mein tumhein dhoondta raha?"

Wo reling pe jhuka samandar ki lahron ko dekhte hue kehne laga.

"Toh na dhoondte." Haya ne be niyazi se shane achakay. Wo usay us ke baal ur ur kar jihan ke kandhe ko chho rahe thay magar wo unhein samatne ka takalluf bhi nahin kar rahi thi.

"Itna ghusa?" Jihan ne gardan mor kar hairat se usay dekha.

Wo tanay hue nqoosh ke saath samnay dekhti rahi.

Aisa bhi kuch nahin kaha tha maine."

"Agar tumhein khud sharmindgi nahi hai to mein kyun dilaun?"

"Meri jagah koi bhi hota to woh yahi poochta."

"Mujhe kisi aur se koi sarokar nahi hai." Sea gulls ka ek ghul par phar phara kar unke samne se guzra tha. Jihan seedha hawa aur haath mein pakri roti ka tukra tor kar fazaa mein uchhala. Ek bade sea gull ne fazaa mein hi ghota laga kar use apni choonch mein daba liya.

Woh khamoshi se pani ki neeli satah ko dekhti rahi. Pani mein gulabi jelly fish teer rahe the unke sirpani ke andar hi the magar woh itna shafaaf tha ke woh wazeh dikhayi deti thi.

"Kya Mera itna bhi haq nahi hai Haya ya ke mein pooch sakoon ke woh shakhs kyun tumhare peechay para hua hai?

"Poocho, zaroor poocho, magar us se jaakar poocho.

"Magar mein nahi jaanta ke woh kaun hai?"

"Mein bhi nahi jaanti ke woh kaun hai."

"Aaj woh Jihan ke liye wahi Haya Suleiman ban gayi thi, jo woh har ek ke liye thi. Khud ko jis shakhs ke samne jhuka liya tha, ab uske samne uthana bhi tha.

"Jeene do... kuch pal to... jeene do..." Woh ladkiyan laheka laheka garaahi thi. DJ bhi kahin unke saath thi.

"Acha, I'm sorry." Woh rukh mor kar uske bilkul muqabil akhra hua aur roti ka bacha hua tukra uski taraf barhaya.

Haya ne nigaah utha kar use dekha to woh zara sa muskuraya.

Ek lamha laga tha use pighalne mein aur woh pighli hui mom ka dheer ban gayi. Bohat dheere se woh muskura di. Khud se kiye sare wade bhool gayi.

"Ok!" Usne roti ka tukra khinch kar tora aur urte hue baglay ki taraf phenka. Usne use fazaa mein hi pakar liya.

"Tumhari turkey ki bohot khoobsurat hai Jihan! Magar yahan ke log achhe nahi hain." Ab woh roti ke tukre kar ke fazaa mein uchal Rahi thi ..